కీలక ఖనిజాల పరిశోధనకు మహీంద్రా యూనివర్సిటీ–ఐఐటీ హైదరాబాద్ భాగస్వామ్యం

 పరిశోధన, నైపుణ్యాభివృద్ధిపై ప్రత్యేక దృష్టి

సంగారెడ్డి ప్రతినిధి, జనవరి 30 (SNM NEWS):

కీలక ఖనిజాల రంగంలో పరిశోధన, విద్య, నైపుణ్యాభివృద్ధిని బలోపేతం చేయడమే లక్ష్యంగా మహీంద్రా యూనివర్సిటీ మరియు భారతీయ సాంకేతిక సంస్థ హైదరాబాద్ (ఐఐటీహెచ్) వ్యూహాత్మక అవగాహన ఒప్పందం కుదుర్చుకున్నాయి. ఈ భాగస్వామ్యం ద్వారా కీలక ఖనిజాలు, స్థిరమైన గనుల తవ్వకం, ఆధునిక పారిశ్రామిక ప్రక్రియలపై సంయుక్త పరిశోధనలు నిర్వహించనున్నారు. ఐరన్ ఓర్ బెనిఫిషియేషన్, బొగ్గు-ఖనిజ ప్రాసెసింగ్, ఉక్కు తయారీ, మైనింగ్ వ్యర్థాల వినియోగం, కీలక-అరుదైన భూమి ఖనిజాల తవ్వకం, ప్రక్రియల మోడలింగ్, సిమ్యులేషన్ వంటి రంగాలు ఇందులో భాగం. అదేవిధంగా మైనింగ్‌లో ఏఐ, డేటా అనలిటిక్స్, మైనింగ్ 4.0, డ్రోన్లు, స్వయంచాలక వాహనాలు, స్టార్టప్‌లు, ఇన్క్యూబేషన్ మద్దతుపై కూడా దృష్టి సారించనున్నారు. ఈ ఒప్పందం ప్రకారం ఐఐటీ హైదరాబాద్‌లో ఏర్పాటు చేసిన కీలక ఖనిజాల సెంటర్ ఆఫ్ ఎక్సలెన్స్ ఒప్పందంకు మహీంద్రా యూనివర్సిటీ స్పోక్ ఇన్‌స్టిట్యూట్గా వ్యవహరిస్తుంది. సంయుక్త పరిశోధన ప్రాజెక్టులు, అధ్యాపకులు-విద్యార్థుల మార్పిడి, ప్రయోగశాలలు, మౌలిక సదుపాయాల సంయుక్త వినియోగం ద్వారా ఈ భాగస్వామ్యం అమలులోకి రానుంది. 

జాతీయ కీలక ఖనిజాల మిషన్  కింద కేంద్ర గనుల మంత్రిత్వ శాఖ ఐఐటీ హైదరాబాద్‌ను సెంటర్ ఆఫ్ ఎక్సలెన్స్‌గా గుర్తించడం ఈ భాగస్వామ్యానికి మరింత బలం చేకూర్చిందని అధికారులు తెలిపారు. ఈ సందర్భంగా మహీంద్రా యూనివర్సిటీ వైస్ చాన్సలర్ డా. యాజులు మెదురి, ఈ సహకారం జాతీయ కీలక ఖనిజాల మిషన్ లక్ష్యాలకు అనుగుణంగా పరిశోధన ఆధారిత స్వదేశీ సాంకేతిక పరిష్కారాలను ప్రోత్సహిస్తుందని అన్నారు. ఐఐటీ హైదరాబాద్ డైరెక్టర్ ప్రొఫెసర్ బి.ఎస్. మూర్తి, కీలక ఖనిజాలు, వనరుల సమర్థ వినియోగంలో స్వావలంబన దిశగా ఈ భాగస్వామ్యం కీలకంగా నిలుస్తుందని తెలిపారు. ఈ ఒప్పందం ద్వారా ప్రత్యేక శిక్షణా కార్యక్రమాలు, సర్టిఫికేట్ కోర్సులు, మాస్టర్ డిగ్రీ ప్రణాళికలు, ఉద్యోగులకు తక్కువ కాల శిక్షణలు, అలాగే స్టార్టప్‌లు, ఎంఎస్‌ఎంఈలకు ఇన్క్యూబేషన్, సీడ్ సపోర్ట్ అందించనున్నారు.